Вадим Шарлаимов – Азия чемпионатының жүлдегері. Индонезияның Бали аралында семсерлесуден ересектер арасындағы Азия чемпионаты басталды, деп хабарлайды 24kz.

Қазақстандық спортшылар арасынан ең бірінші болып Вадим Шарлаимов жүлдеге ілікті. Ол аталмыш спорт түрінің семсер бағытында сынға түскен болатын. Жекелей бәсекенің іріктеу кезеңін сәтті өткізді. Тіпті ширек финалда 2 дүркін Олимпиада жеңімпазы жапониялық Коки Каноны жеңіп, өзіндік сенсация жасады. Ал, жартылай финалда Шарлаимов тағы бір жапониялық Масару Ямадаға жол беріп, жарысты қола жүлдемен аяқтады. Жалпылама айтар болсақ, бірінші орынды қытайлық Ван Цзыцзе жеңіп алды. Екінші орынға жоғарыда айтқан жапон жігіті Масару Ямада жайғасты. Үшінші сатыны қазақстандық Вадим Шарлаимовпен бірге Қытай өкілі Синькунь Чжан бөлісті. Бали аралындағы Азия чемпионатының қорытындысы 23 маусымда белгілі болады.