Таразда мүмкіндігі шектеулі балаларға арналған иппотерапия ғимаратының құрылысы 4 жылдан бері тоқтап тұр. Жабық манеж ішінде емдеу, сауықтыру шараларына арналған бөлмелер болу керек еді.

Бүгінде «Мамыр» саябағындағы нысан қараусыз қалған. Өңірдегі жалғыз иппотерапия курсына 45 бала барып, атпен серуендейді. Орын тапшылығынан тағы 40-қа жуық бала кезекте тұр. Сондықтан 2021 жылы қосымша ғимараттың құрылысы басталған еді. Орталықтың ашылуын асыға күткендердің бірі Раушан Дербісалиева. Аутизммен ауыратын екі баласын 3 жылдан бері осында емдетеді. Ата-аналар иппотерапия орталығының жыл он екі ай жұмыс істегенін қалайды.

Раушан Дербісалиева, Тараз тұрғыны:

Агрессиясын тыныштандырады. Балаға энергия береді. Маусымдық кезінде келеміз тек қана, осы иппотерапияға. Ал қыс кезінде тоқтап қалады. Ғимарат керек, 40 баладан бөлек басқа да балалар кезекте тұр осындай ерекше балалар.

Ал қала әкімдігі әу баста әлеуметтік нысанды демеушілер салып беретін болған дейді. Бірақ кейін бас тартқан. Құрылыс қарқынды басталғанымен бір жыл өтер-өтпес уақытта тоқтап қалады. Сөйтіп әкімдік нысанды өз теңгеріміне алған. Ал жобаны жандандыру үшін 931 миллион теңге керек. Қаржы қарауға қала әкімдігі қауқарсыз. Сондықтан облыстық бюджетке иек артып отыр.

Дәурен Сәдуақасов, қала әкімдігі құрылыс бөлімінің сектор меңгерушісі:

2023-жылы құрылыс бөлімі тарабынан жобасы жалғастырылып, жоба жасалып, сараптаманың оң қортындысы алынған, 2023 жылы мамыр айында. 2024-те де 25 те де жыл сайын қайталанып берілді. Мәслихат шешімімен қаржы бөлінеді. Алдындағы бюджеттік өтінімдер қолдау таппағаннан кейін 2025-ке де өтінім бердік.

Данияр Әлімқұл