Еуроодақ, оның ішінде Испания қақтығыстарды дипломатиялық жолмен шешуді жақтайды, деп хабарлайды 24kz.

Мысалы жақында ғана Израиль мен Иран арасындағы текетіресті «ескірген драматургия» деп сипаттап, екі мемлекетке де дереу дипломатиялық шешім іздеуді ұсынды. Ресми Мадрид Тегеранға ашық қолдауын көрсеткен емес. Дегенмен, биік мінберлерден Израиль әрекетін үнемі сынап отырады. Бір жыл бұрын Испания Палестинаны егемен мемлекет ретінде ресми түрде мойындады. Үкімет басшысы Педро Санчес бұл қадамды тарихи әділеттілік деп атап, оны Таяу Шығыста бейбітшілікке қол жеткізудің маңызды шарты деп мәлімдеді.

Педро Санчес, Испания премьер-министрі:

- Испания әлемде Палестинаны егемен мемлекет ретінде таныған 140-тан астам елдің қатарына қосылды. Бұл Израильге қарсы бағытталған шешім емес. Керісінше, біз Израиль халқымен достық қарым-қатынасымзды сақтай отырып, бейбітшілікке қол жеткізуді қалаймыз.

Жалпы Испания 2023 жылдан бері Палестинаға қаржылық көмекті үш есе арттырып, гуманитарлық және даму жобаларына 114 миллион еуро бөлді. Ал жақында ресми Мадрид Палестинаға көмек әрі қарай жалғасатынын мәлімдеді.

Хосе Мануель Альбарес, Испания сыртқы істер министрі:

- Испания Иордания тарапымен бірлесіп, Газа секторына 26 тонна гуманитарлық көмек жеткізу операциясын жүзеге асырды. Бұл қолдау елміздің халықаралық ынтымақтастық агенттігі арқылы ұйымдастырылды.

АҚШ пен Испания НАТО шеңберінде одақтас мемлекеттер. Бірақ Таяу Шығыстағы ахуалға қатысты

Екі елдің қазіргі қарым-қатынасы күрделі. Өйткені ресми Мадрид кейде қауіпсіздік және халықаралық құқық тұрғысынан өзінің жеке позициясын ұстанады. Алпауыт мемлекеттің Қызыл теңіздегі операцияларын қолдамайды. Израильдің әрекеттеріне гуманитарлық жағдайды алға тартып, наразылық танытып отырады. Мысалы, Испания Израильдің Газа мен Ливанға қарсы шабуылдарын ашық айыптады.

Ал Иранға келетін болсақ Мадридтің бұл елге санкцияларды қолдауы Вашингтонның аймақтағы стратегиясымен үндеседі. Бірақ Испания ядролық мәселені шешуде көпвекторлы диалогқа басымдық береді.

Авторы: Аида қыдырбай