Медицина қызметкерлері – ең қадірлі мамандық иелері. Осылай деген Президент сала мамандарын төл мерекесімен құттықтап, отандық медицинаны дамытуға елеулі үлес қосқан қызметкерлерді марапаттады. Олардың арасында бүкіл өмірін салаға арнаған, тіпті әулетімен бірге міндетін абыроймен атқарып жүргендер бар. Ақордаға алғаш келіп, Мемлекет басшысының қолынан награда алған ақ халаттылар кімдер? Саланың бүгінгі жай-күйі қалай? Нұрсұлтан Тілектес толықтырып айтады.

Бүгін Тәуелсіз Қазақстан тарихында алғаш рет медицина мамандары Ақордаға кірді. Оларды Мемлекет басшысы қарсы алып, түрлі деңгейдегі мемлекеттік наградалармен марапаттады.

Дәрігерлер адам – өмірінің сақшысы. Олардың жанкештілігі әсіресе пандемия кезінде байқалды. Қауіпті вирусты ауыздықтап, талай адамның жанын сақтап қалған мамандар – бүгінгі күннің батырлары, — деді Қасым-Жомарт Тоқаев.

Қасым Жомарт Тоқаев, Қазақстан Республикасының Президенті:

Медицина қызметкерлері – ұлт саулығының сақшылары, ең қадірлі мамандық иелері. «Бір адамның өмірін құтқару барша адамзатты құтқарумен бірдей». Дәрігерлер ота кезінде, аурухана палатасында күн сайын ерлік жасайды десек, артық болмайды. Жедел жәрдем көлігінде адам өміріне араша түсетін сәттер болады. Сондықтан сіздер, құрметті медицина қызметкерлері, бейбіт күннің батырлары деген атқа лайықсыздар.

Мерекеге орай саланың арадегерлері мен жас мамандары ІІІ дәрежелі «Барыс», «Парасат», «Құрмет» орденімен, сондай-ақ «Ерен еңбегі үшін» және «Шапағат» медалімен марапатталды. Ал 4 маманға «Қазақстанның еңбек сіңірген дәрігері» құрметті атағы берілді.

Мырзакәрім Алшынбаев, С.Асфендияров атындағы ҚАЗҰМУ кафедра меңгерушісі, ІІІ дәрежелі «Барыс» орденінің иегері:

Бүгін менің екінші әріптесім, жас бала осындай марапатталды. Президенттің өзінен... Бір жерде екі уролог марапатталу ол – ғанибет нәрсе. Оған қуанамын. Мен әріптестерімнің бәрі үшін қуанамын. Олардың барлығының еңбегі адал.

Шолпан Алтынова, Ана мен бала орталығының нефролог-дәрігері, «Құрмет» орденінің иегері:

2012 жылы біз Астанада Ана мен бала орталығында бүйрек трансплантациясы бағдарламасын бастады. Сол 2012 жылдан бері 160-қа жуық балаға бүйрек салып бердік. Науқастардың атынан сөйлегім келіп отыр. Науқастарға тегін ем беріледі, тегін дәрі-дәрмек беріледі. Сол үшін Үкіметімізге, Мемлекет басшысына дәрігерлердің атынан алғыс айтқым келеді.

Жиында Мемлекет басшысы елімізде денсаулық сақтау саласының тиісті деңгейде дамып жатқанына тоқталды. Атап айтсақ, соңғы 5 жылда 800-ге жуық емхана мен аурухана салынды. Ең бастысы ана мен бала өлімі 12 пайызға азайып, халықтың орташа өмір сүру ұзақтығы 75 жасқа жетті. Жыл сайын 45 мемлекеттен 10 мыңға жуық адам Қазақстанға емделуге келеді. Бұл саланың деңгейі біршама артқанын аңғартады. Тағы бір оң өзгеріс медицина мамандарының мәртебесі артып, жалақысы да өсті.

Қасым-Жомарт Тоқаев, Қазақстан Республикасының Президенті:

Менің тапсырмаммен былтырдан бастап «Қазақстанның еңбек сіңірген дәрігері» атағы беріле бастады. Бұл – медицина қызметкерлеріне деген айрықша құрметтің белгісі. Соңғы 5 жылда денсаулық саласындағы жалақы 2 есеге өсті. Медицина кадрларын даярлайтын университеттер мен колледждердің шәкіртақысы көтерілді.

Жыл санап денсаулық саласына бөлінетін қаржы көлемі де артып келеді. Биыл отандық медицинаны дамытуға 2,6 трлн теңге қарастырылған. Айта кету керек, бүгінде елімізде 380 мыңға жуық медицина маманы қызмет етеді.

Нұрсұлтан Тілектес