Талғарда қаза тапқан 16 жастағы Шерзат Полаттың ата-анасының адвокаты Мейірман Шекеев қоғамда үлкен резонанс тудырған қылмыстық іс аясында азаматтық талап бойынша тағайындалған өтемақы мәселесіне қатысты түсініктеме берді, — деп хабарлайды Massaget.kz тілшісі.

Еске салсақ, 2025 жылдың 5 маусымында сот шығарған үкімге сәйкес, Шерзат ісі бойынша әртүрлі мерзімге бас бостандығынан айырылған айыпталушылар марқұмның отбасына моральдық зиян үшін өтемақы төлеуі тиіс. Кәмелетке толмаған Ы.-ға азаматтық талап қойылған жоқ.

Сот шешімі бойынша:

Айыпталушы Абзал Шынасыл марқұм Шерзат Полаттың әкесі Қаржаубай Нұрымовқа, анасы Гүлбарам Бейшенбиеваға және әжесі Жұмабике Қадыроваға әрқайсысына 20 миллион теңгеден өтеуі тиіс.

Равиль Сакиев Қаржаубай Нұрымов пен Жұмабике Қадыроваға әрқайсысына 15 миллион теңгеден төлеуі тиіс.

Қалған айыпталушылар (Азамат Токтаубаев, Нұркияс Ілиясов, Шыңғыс Белғожаев, Нұрбол Токтаубаев, Дархан Аскентай, Дидар Қалихмет) жалпы 10 миллион теңге сомасында Шерзат Полаттың әкесі, анасы және әжесіне бірлесіп өтеуі тиіс.

Өтемақыдан бас тарту?

Мейірман Шекеев марқұм Шерзаттың әкесі Қаржаубай Нұрымовпен өтемақының қалай бөлінетіні жөнінде нақты талқылау болмағанын айтты.

Алайда, Шекеевтің айтуынша, бұған дейін Нұрымов "ақша алғысы келмейтінін" айтқан.

"Біз 120 миллион теңге өндіріп алдық. Сол кезде ол (Нұрымов) маған: "Егер бұл ақша түссе де, кейін оны мұқтаж жандарға жіберемін", – деді. Бірақ ол нақты түрде балалар үйі ме, әлде қайырымдылық қорына ма айтпады. Сонда мен айттым: бұл (азаматтық талап – ред.) айыпталушылардың шартты түрде мерзімінен бұрын босап шықпауы үшін қажет", – деді Шерзаттың әкесінің адвокаты.

Кейінірек, Шекеевтің айтуынша, егер ақша түсе бастаса, "әрине, егжей-тегжейлі сөйлесеміз".

"Кеше ғана онымен (Қаржаубай Нұрымовпен – ред.) сөйлестім, оған: "Біз 120 миллион теңге өндіріп алдық. Позицияң өзгермеді ме?" – деп сұрадым. Ол: "Жоқ, өзгерген жоқ", – деді", – деді заңгер.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!