Бұл биіктігі 28 метрден асатын нысандарға қатысты .

Сенат "Қазақстан Республикасының кейбір заңнамалық актілеріне азаматтық қорғау, электр энергетикасы және мемлекеттік мүлікті басқару мәселелері бойынша өзгерістер мен толықтырулар енгізу туралы" заңды екі оқылымда қарап, қабылдады, деп хабарлайды inbusiness.kz сайты.

Заңның мақсаты – азаматтық қорғау саласындағы заңнаманы жетілдіру, оның ішінде өрт және өнеркәсіптік қауіпсіздіктің, мемлекеттік өрт қадағалауының, ТЖ салдарын жоюдың, мемлекеттік материалдық резервтің, азаматтық қорғаныстың жұмыс істеуін жақсарту.

10 кодекске, 37 заңға өзгерістер мен толықтырулар енгізіледі.

"Мәселен, мемлекеттік материалдық резерв жүйесін орталықсыздандыруды жүргізу, өнеркәсіптік қауіпсіздік саласындағы бақылауды күшейту, азаматтық қорғаныстың қорғаныш құрылыс жайларын міндетті мемлекеттік тіркеуді енгізу, сейсмологиялық бақылаулар желілерін және ерте құлақтандыру жүйелерін кеңейту және жаңғырту, сондай-ақ аумақтық органдарды азаматтардың жетуі қиын жерлерде және қауіп-қатері жоғары объектілерде жүріп-тұру маршруттары туралы хабардар ету тәртібін белгілеу ұсынылады. Заң нормаларына сәйкес адамдар көп болатын объектілер мен биіктігі 28 метрден асатын ғимараттарды пайдалануға беру кезінде өрт бақылауы қайта басталады. Сонымен қатар, өрт салдарынан үшінші тұлғаларға зиян келтірілген жағдайда адамдар көп болатын объектілер иелерінің азаматтық-құқықтық жауапкершілігін міндетті сақтандыру енгізіледі", – делінген заңға берілген қорытындыда.

Сонымен қатар әлеуметтік сипаттағы, оның ішінде азаматтық қорғау органдары қызметкерлерінің тұрғын үй мәселелерін шешу бойынша бірқатар нормалар көзделеді.

"Өртті сөндіру жөніндегі іс-шараларға тартылатын ерікті өрт сөндірушілер жарақат алған немесе ауырған жағдайда өтемақы төлемдеріне құқық берудің еңбек кепілдіктерін алады. Бұдан басқа, мемлекеттік меншікті басқару саласындағы заңның жекелеген нормаларымен тікелей атаулы сатуға жол беретін нормаларды алып тастау, сондай-ақ үлестес тұлғалардың аукциондарға қатысуына тыйым салуды енгізу жолымен жекешелендіру тетігін жетілдіру ұсынылады", – делінген заңға берілген қорытындыда.