Тарихшы, Йассауитанушы Зікірия Жандарбек “Qasqa Jol” подкастында қонақта болып, көптеген тың ақпаратпен бөлісті, деп хабарлайды Skifnews.kz ақпарат порталы.

Айта кетейік, Мұхамеджан Тазабек осыдан бірнеше күн бұрын берген сұхбатында Йассауи жолын ұстанатын Исматулла қажымен байланысы жоқ екенін айтқан болатын. Зікірия Жандарбек Исматулла қари жайлы да ел біле бермейтін деректерді айтып өтті.

“Бұлардың бәрі ашығын айтқанда-жат идеологияның жетегіндегі адамдар. Исматулла қаридың жолын ұстанып, соның соңынан еріп, сол кісінің дегенімен жүргенде мысалы, Ауғанстан халқы ешкімнің алдында тізе бүккен жоқ. Баяғыда “Жас Алаш” газетінде бір мақала шыққан. Сол кезде Ауғанстан Президенті Имам Роббани мен Шах Махсұд екеуі Исматұлла қаридың алдында тізе бүгіп, бата сұрап отырған. Осының өзі нені көрсетеді? Демек, сол кездегі соғысып жатқан бір елдің президенті сол Исматулла қаридың алдында тізе бүгіп отыр. Оны мойындағаны. Ол кісі Ауған соғысы кезінде 400 дей отрядты Кеңес әскерінің төбеден жаудырған бомбаларынан аман алып қалған. Бірде-бір бомба түспеген. Сондағысы тек зікір салып отырған. Сондай адамды құдіреті жоқ деп мен айта алмаймын. Міне, сондықтан сопылық ілім дегеннің құдіретін сезіну керек, түсіну керек”, — деді ол.

Осы тұста тарихшы Мұхамеджан Тазабек пен Бекболат Тілеуханның ұстанатын діни ағымы бойынша сұрақтарға ашық жауап берді.

“Бұлар тек қана адамның физикалық болмысының қажеттілігін өтейтін шариғат жолында. Ахләл хадис жолында. Бұлар ешқашан да рухты мойындамаған. Рухты мойындамаған жерде ешқашан да адами жолмыс жоқ. Рухты мойындамаса, ол жерде дін бар деп ойламаймын мен. Рухты Аллаға серік қосу десе, онда бітті деген сөз. Себебі, Рух дегеннің өзі Алланың адамға берген аманаты. Осыны мойындамай тұрған адамдарда қандай иман болады? Рухсыз сен робот боласың. Қазір батыстың барлық жасап жатқан мақсаты сол адамды биороботқа айналдыру. Ал уаһабилік деген ислам елдерін ірітудің ең негізгі құралының біріне айналып отыр. Сол қалған Мұхамеджан Тазабеков те, Бекболат Тілеухан да биороботтар”, — деп кесіп айтты ол.