Қонаев қаласында саяжай алқаптарын қала құрамына енгізу жұмыстары белсенді түрде жүргізілуде , деп хабарлайды 24kz.

Бұл қадам тұрғындарды орталықтандырылған сумен, электр қуатымен, кәріз жүйесімен және өзге де коммуналдық игіліктермен қамтамасыз етуге мүмкіндік береді. Дегенмен, іс-шаралар барлық жерде бірдей жүріп жатқан жоқ.

Гүлім Советхан, тілші:

- Қонаев қаласының аумағына кіретін «Алтын Алма» саяжай массивінде шамамен 40 учаске бұрынғыдай саяжай кооперативі арқылы қызмет алып отыр. Алайда әкімдіктің мәліметінше, бұл кооперативтің «Қонаев су арнасы» мекемесімен ресми келісімшарты жоқ. Қазірдің өзінде бір жарым миллион теңгеге жуық қарыз жиналған. Сондықтан тұрғындардың басым бөлігі коммуналдық төлемдерін уақытылы төлеп отырғанына қарамастан, бүкіл массивте су беру тоқтатылуы мүмкін.

Қуантай Арыстанбаев, «Алтын Алма» саяжайының тұрғыны:

- Су құбырын өткізіп жатырмыз. Соның 175-і адамы өтті, қалған 40 адам әлі сол Черкезяноваға ақшасын төлеп отыр. Ол біздің бас кеңседе тұрған есептегіш арқылы алып отыр суды. Содан қарыздың бәрі кімге барады? Бізге келеді. Өйткені пайдаланушылар солар, ал оған қарызды біз төлейміз. Бізде қазір 1,4 млн қарыз боп тұр.

Осындай жағдайларды болдырмау үшін «Оңтүстік» пен «Сирень» сияқты басқа массивтерде тұрғындар қарапайым тұтынушылар бірлестігін құрған. Олар қаланың коммуналдық мекемелерімен тікелей келісімшартқа отырды. Сот инженерлік желілердің жекеменшікке жатпайтынын растап, оларды қаланың қарауына өткізуге рұқсат берген. Қазір бұл үйлер коммуналдық қызметтерге қала тарифтері бойынша төлем жасап отыр.

Болат Садықов, «Қонаев су арнасы» МКК басшысының орынбасары:

- Тікелей келісімге өтпегендерді желіден ажыратуға құқығымыз бар. Бірақ біз бұған әзірге барып отырған жоқпыз. Түсіндіру жұмыстарын жүргізіп, диалог арқылы мәселені шешуге тырысып отырмыз.

Қаланың коммуналдық басқаруына өткен саяжай массивтерінде оң өзгерістер байқалады. Көшелерге жаңа жарық шамдары орнатылды. Тұрғындардың айтуынша, қалалық жүйеге қосылу жақсы өзгерістер алып келді. Соның ішінде су үшін төленетін ақы едәуір төмендеген.

Авторлары: Гүлім Советхан, Аят Дүйсенбай