БҰҰ-ның Жасыл климаттық қоры Қазақстандағы 280 млн доллар сомасына экологиялық жобаларды қаржыландырады.

Бұл туралы Экология және табиғи ресурстар министрі Ерлан Нысанбаев мәлім етті.

«Жасыл климаттық қор, климаттың өзгеруіне қарсы күресте және оған бейімделуде елдерді қолдаудың негізгі қаржылық тетігі болып табылады. Халықаралық ұйымдардың қолдауымен Қазақстанға осы Қор тарапынан шамамен 280 млн АҚШ долларына қаржыландыру келіп түсетіні қарастырылған. Аталған қаражат жаңартылатын энергия көздерін дамытуға, өнеркәсіп секторында төмен көміртекті технологияларды енгізуді ынталандыруға, сондай-ақ электромобильдерді дамытуды қолдауға бағытталды», – деді Е. Нысанбаев Сенатта экология саласында озық технологияларды енгізу тақырыбын талқылау кезінде.

Министр жасыл жобаларды ілгерілету үшін Readiness II жобасы аясында 2024 жылы Жасыл климаттық қорға арналған Елдік бағдарлама дайындалғанын еске салды. Оған 7 жоба енгізілген. Жобалар энергетика секторындағы парниктік газдар шығарындыларын азайтуға, ауылды елді мекендердегі орталықтандырылған сумен жабдықтау жүйелерінің тұрақтылығын арттыруға, мал шаруашылығы фермаларын жаңғыртуға, сондай-ақ «жасыл» қаржыландыру саласындағы жеке сектордың бастамаларын қолдауға бағытталған. Бұл жобалардың құны шамамен 1 млрд АҚШ долларды құраса, оның 630 миллионын аталған Қор қаржыландыруы мүмкін.

Сонымен қатар, Қазақстанда жаңартылатын энергия көздері бойынша Жасыл климаттық қор мен Еуропалық Қайта құру және Даму Банкі бағдарламасы аясында жалпы қуаттылығы 330 МВт болатын жаңартылатын энергия көзі саласында 11 жобаның құрылысын қолдау көзделген. Қазір 9 жоба қаржыландырылды (жобаны іске асыру мерзімі 2017- 2027 жылдар).