Қытайда өмір бойына бас бостандығынан айырылған Ақжарқын Тұрлыбайдың ісімен енді Бас прокуратура айналысады. Сыртқы істер министрлігінің ресми өкілі Айбек Смадияров осылай дейді. Оның айтуынша Қазақстанның Қытайдағы елшілігі Ақжарқынмен кездесіп, жағдайын біліп отыр. Бірақ оның жазасын елге келіп өтеу туралы өтініші қашан орындалатыны белгісіз.

Еске салайық, Ақжарқын Тұрлыбай 2014 жылы Қытайда есірткі тасымалдаумен айналысқан қылмыстық топтың мүшесі ретінде ұсталып, өмір бойына бас бостандығынан айыру жазасына кесілген болатын.

Айбек Смадияров, СІМ ресми өкілі:

Шетелде қамауда отырған өз азаматтарымызбен кездесу – бұл біздің елшілігіміздің жыл сайынғы міндеті. Сондықтан бұл жұмыс тұрақты түрде жүргізіледі. Барлық қажетті іс-шаралар атқарылды. Бұдан әрі Бас прокуратура желісі бойынша ақпарат алмасу жүргізіледі.

Оңтүстік Кореяда қазақстандық 4 азамат жол апатынан қаза тапты

Сондай-ақ Мысыр әуежайында басына жарнама тақтайшасы құлап қаза тапқан әйелдің ісі бойынша қылмыстық іс қозғалған. Осы оқиғадан кейін Қазақстан тарапы Египет билігінен курорттар мен әуежайларда қазақстандық жолаушылардың қауіпсіздігін жоғары деңгейде қамтамасыз етуді талап етті.

Бұдан бөлек, министрлік өкілі Оңтүстік Кореяда жол апатынан қаза тапқан 4 отандасымызға қатысты ақпараттармен бөлісті. Оның айтуынша, шетелге түрлі мақсатпен барған 20-21 жастағы жігіттер көлікті қатты жылдамдықпен басқарған.

Сыртқы істер министрлігінде өткен брифингте Астана халықаралық форумы да қорытындыланды. Онда жиынға қатысқан шетелдік делегаттардың арқасында форумның ел экономикасына мультипликативтік әсері 2,6 млрд теңгеден асқаны айтылды.

Серік Жұмабекұлы