Жаздың бірінші айында ауа райы құбылмалы болады деп күтіледі, атмосфералық айналымның жазға тән ерекшеліктері тұрақсыз күн райының қалыптасуына ықпал етеді, деп хабарлайды Egemen.kz.

Маусым айында салқын және ыстық ауа райы алмасып отырады, кей күндері найзағайлы, бұршақты, екпінді желмен бірге жауын-шашын болады. Кей күндері шаңды дауылдар күтіледі.

«Маусым айының бірінші онкүндігінде Қазақстанның барлық өңірлерінде жоғары температура фоны аясында жиі найзағайлы қысқа мерзімді жаңбырлар болжанады. Тек кей күндері тропикалық ауа массаларының орнына салқындау атлантикалық ауа келгенде ыстық бәсеңдейді. Мысалы, бірінші онкүндікте республиканың батысында түнгі температура +17…+22°С-тан +7…+12°С-қа дейін, күндіз +27…+32°С-тан +20…+25°С-қа дейін төмендейді. Атырау, Маңғыстау, Ақтөбе, Қостанай және Ұлытау облыстарында түнде +18…+28°С-тан +12…+23°С-қа дейін, күндіз +30…+38°С-тан +20…+30°С-қа дейін төмендейді, алайда онкүндіктің соңында күндізгі температура қайтадан +25…+32°С-қа дейін көтеріледі», деп хабарлайды синоптиктер.

Солтүстік және орталық өңір тұрғындары үшін де ыстықтың бәсеңдеуі бірінші онкүндіктің ортасында күтіледі: түнгі температура +10…+15°С, солтүстіктің ең шетінде +7°С-тан +15…+20°С-қа дейін, күндіз +25…+30°С-тан +18…+25°С-қа дейін ауытқиды.

Республиканың шығысында онкүндіктің көп бөлігінде түнгі температура +10…+15°С шамасында, оңтүстігінде +20°С-қа дейін, күндіз +22…+30°С, оңтүстікте ыстық +35°С-қа дейін, бірінші онкүндіктің соңында, екінші онкүндіктің басында күн салқындай түседі.

Оңтүстікте және Жамбыл облысында түнде де ыстық сақталады, термометр көрсеткіштері +20…+28°С-қа дейін, күндіз +35…+43°С-қа дейін көтеріледі, алайда бірінші онкүндіктің соңында ауа температурасы аздап төмендеп, күндіз +28…+33°С шамасында болады.

Республиканың оңтүстік-шығысында, Алматы және Жетісу облыстарында түнгі ауа температурасы біртіндеп +10…+15°С-тан +15…+20°С-қа дейін, күндіз +20…+25°С-тан +30…+35°С-қа дейін көтеріледі, таулы аймақтарда түнде +2…+7°С-тан +7…+12°С-қа дейін, күндіз +10…+15°С-тан +20…+25°С-қа дейін, онкүндіктің екінші жартысында күндіз +25…+30°С күтіледі.

«Маусым айының екінші және үшінші онкүндіктерінде еліміздің батысында, оңтүстігінде, оңтүстік-шығысында ауа температурасы +33…+40°С-қа дейін, ал оңтүстік-батыс пен оңтүстіктің ең шеткі бөліктерінде +43°С-қа дейін көтеріледі, салқындау күндері +22…+27°С-қа дейін төмендейді. Солтүстікте, орталықта және шығыста түнгі температура +15…+23°С-тан +2…+10°С-қа дейін, күндіз +25…+38°С-тан +15…+27°С-қа дейін ауытқиды», деп хабарлады «Қазгидромет».