Тергеу барысында оқиғаның тұрмыстық сипатта болғаны анықталған.

Бұл туралы Үкіметте өткені брифингте Премьер-министрдің орынбасары Қанат Бозымбаев сөз етті, деп хабарлайды inbusiness.kz сайты.

Еске салайық, жантүршігерлік өрт оқиғасы 2025 жылдың 18 қарашасында Алғабас ауылындағы екі қабатты жеке тұрғын үйде тіркелді. Қызыл жалын 12 адамның, оның ішінде 9 баланың өмірін қиды.

– Бұл – тұрмыстық жағдай. Менің білуімше, тергеу аяқталды. Оқиға электр құрылғыларына байланысты болған.

Үкіметтік комиссия алғашқы айда бірнеше рет жиналып, жағдайды бақылауда ұстады. Сараптама қорытындысынан кейін-ақ бұл қылмыстық емес, тұрмыстық оқиға екені белгілі болды, – деді Қанат Бозымбаев.

Қайғылы оқиғадан кейін қылмыстық іс Қылмыстық кодекстің 292-бабы 3-бөлігі – "Өрт қауіпсіздігі талаптарын бұзу" бойынша тергелген еді.

Президент Түркістан облысында өрт салдарынан қаза болғандардың жақындарына сол күні-ақ көңіл айтқан болатын.