Бұл туралы Ресей президентінің баспасөз хатшысы Дмитрий Песков мәлімдеді.

Ол "Сібір күші-2" жобасына қатысты кейбір мәселенің әлі де басы ашық күйде қалғанын жасырмады, деп хабарлайды inbusiness.kz сайты.

Еске салайық, 12 жылдан астам уақыттан бері талқыланып келе жатқан бұл жоба Ресейдің Қытайға газ экспортын жылына 100 млрд текше метрге дейін арттыруды көздейді.

– Жалпы алғанда, "Сібір күші-2" жобасы бойынша негізгі түсіністік бар. Бірақ кейбір жекелеген мәселелерді әлі де пысықтау қажет, – деді Песков Владимир Путин мен Қытай төрағасы Си Цзиньпин арасындағы келіссөздерден кейін.

Оның сөзінше, әзірге жобаның нақты қашан іске асатыны белгісіз.

Жаза кеткен жөн, бұл жоба Қазақстан үшін де маңызды саналады. 2025 жылдың желтоқсанында ҚР Энергетика министрі Ерлан Ақкенженов "Сібір күші-2" газ құбырынан тартылатын тармақтар арқылы елдің шығыс өңірлерін газдандыру нұсқасы әлі де қарастырылып жатқанын растаған еді.

Екі жыл бұрын Financial Times басылымы газ құбыры құрылысына қатысты келіссөздердің "тұйыққа тірелгенін" жазды. Басылым дерегінше, Мәскеу Қытайдың газ бағасы мен жеткізу көлеміне қатысты талаптарын негізсіз деп есептеген.

Қытай тарапы Ресей ішіндегі субсидияланған ішкі бағаларға барынша жақын тариф сұраған. Бұл – шамамен мың текше метр газ үшін 50 доллар көлеміндегі баға. Яғни, Бейжіңнің қазіргі төлеп отырған құнынан бес есеге жуық арзан.