2026 жылы жаңа халықаралық бағыттарды ашу жалғасып жатыр.

Бұл туралы Көлік министрі Нұрлан Сауранбаев Үкімет отырысында айтты, деп хабарлайды inbusiness.kz сайты.

"Отандық және шетелдік әуе компаниялар Қазақстанның халықаралық бағыттарын көбейтіп жатыр. 2026 жылы жаңа халықаралық бағыттарды ашу жалғасуда. Қазірдің өзінде 4 жаңа рейс ашылды (Алматы–Шанхай, Астана–Ереван, Атырау–Ташкент, және Ақтау–Ереван). Сонымен қатар 2026 жылы тағы 11 халықаралық бағытты ашу немесе қайта іске қосу жоспарланып отыр", – деді Көлік министрі.

Ведомство басшысы бүгінде әлемдік авиациядағы басты мәселелердің бірі ұшақ тапшылығы екенін атап өтті.

"Жаңа ұшақты күту өте ұзақ. Мысалы, бүгін тапсырыс берсе, оны тек 8–10 жылдан кейін алады. Өткен жылы өздеріңіз көргендей, Америкада Boeing компаниясы мен отандық компаниялар 15 млрд АҚШ долларына келісімге отырды. 2026 жылы 3 ұшақ сатып алынды, оның ішінде өзіңіз білетіндей осыдан бір ай бұрын "Scat" авиакомпаниясына бір күнде 2 жаңа заманауи Boeing келген болатын. Осы жылдың аяғына дейін қазақстандық авиакомпаниялардың паркіне тағы 6 ұшақ қосылады", – деп атап өтті Нұрлан Сауранбаев.