Қазақстанда қалалық әуе мобильділігін дамыту бағытында жаңа кезең басталды. Alatau City алаңында тік ұшып-қонатын электрлі әуе көлігі – eVTOL аэротаксидің алғашқы демонстрациялық ұшуы өтті, деп хабарлайды «24KZ».

Жоба қалалық әуе тасымалын дамытумен қатар, жаңа сала – «төмен биіктіктер экономикасын» қалыптастыруға бағытталған.

Басты оқиға – AutoFlight Prosperity жолаушылар аппаратының алғашқы демонстрациялық ұшуы болды. Ол бір ұшқыш пен бес жолаушыға арналған.

Аппарат 13 электр моторымен жабдықталған және сағатына 200 шақырымға дейін жылдамдыққа қабілетті. Көліктің ерекшелігі – дыбыссыз жұмыс істеуі және көмірқышқыл газының (CO₂) шығарылмауы. Қауіпсіздік талаптарына сәйкес, алғашқы сынақ ұшуы бортта адамсыз режимде орындалды.

Жоба жеке инвестициялар есебінен жүзеге асырылып отыр, жалпы құны 300 млн АҚШ долларына бағаланады.
Премьер-Министрдің орынбасары — Жасанды интеллект және цифрлық даму министрі Жаслан Мәдиев бұл бастаманың маңызын атап өтті:

«Бүгін Қазақстан жаңа буын көлігін дамытуда маңызды қадам жасап отыр. eVTOL демонстрациялық ұшулары қалалық әуе ұтқырлығының серпінді технологияларының тәжірибеге айналып келе жатқанын көрсетеді.
Alatau City үшін бұл – ақылды қаланың жаңа инфрақұрылымын қалыптастыру. Аэротакси, вертипорттар және цифрлық навигацияны біріктіретін толық экожүйе жасалып жатыр», — деді министр.

Ұйымдастырушылардың айтуынша, жобаның басты мақсаты – тек әуе көлігін енгізу емес, қалалық әуе мобильділігінің жаңа жүйесін қалыптастыру.

Болашақта Alatau City-де вертипорттар желісі құрылып, Алматы қаласы мен туристік аймақтарды байланыстыратын әуе бағыттары іске қосылмақ. Мәселен, Алматы әуежайынан Медеуге дейінгі жол жүру уақыты 10–12 минутқа дейін қысқаруы мүмкін.